Fyrir nokkru auglýstum við eftir handriti til að taka þátt í Les Arcs Film Festival sem hefst þann 16.desember næstkomandi. Innifalið var ferðin til Frakklands, gisting, matur, skíðapassi og að sjálfsögðu tækifæri til að kynna verkefni sitt fyrir fjölda framleiðanda. Við getum nú tilkynnt að fyrir valinu varð Ólöf Birna Torfadóttir.

Ólöf útskrifaðist frá Kvikmyndaskólanum frá Handrita og leikstjórnar deild og Hrafnkell Stefánsson , Námsstjóri Kvikmyndaskólans og formaður nefndarinnar sem valdi verkið, hafði þetta að segja um Ólöfu;

Ólöf var fyrirmyndarnemandi alveg frá fyrsta skóladegi. Það kom því ekki á óvart að hún væri með frábært og spennandi verkefni til að kynna fyrir framleiðendum á hátíðinni. Handrit sem hún vann hér í skólanum undir leiðsögn leiðbeinanda og hefur haldið áfram að vinna með frá útskrift. Ég er handviss um að hún muni standa með sóma þarna úti í nafni skólans

Við báðum Ólöfu að segja okkur lítillega frá verkefninu sínu ;

Karen, lífsreynd sveitapíja, kemur á vel pimpaða bílnum sínum að sækja vinkonu sína Tönju, fálát borgarsnót, sem akkurat á því mómenti er að lemja sokkum í andlitið á kærastanum og hætta með honum enn eina ferðina. Þær stöllur halda saman út á land þar sem þær hyggjast vinna á stóru sveitabýli yfir sumarið. Tanja á erfitt með sig eftir sambandsslitin og virðist strax sjá eftir ferðinni en þegar á býlið er komið fellur hún fljótt fyrir myndarlegum sveitapilt þar á bæ. Hins vegar þegar tilraunir hennar til að heilla piltinn upp úr skónum misheppnast herfilega byrjar hún að dást að því hvernig Karen virðist geta sofið hjá hverjum sem er án væntinga eða eftirmála. Tanja biður því Kareni um að kenna sér að vera eins og hún. Kenna henni hvernig á að vera klassa drusla.

“Hvernig á að vera klassa drusla” er gamanmynd í fullri lengd um vinkonurnar Kareni og Tönju sem hafa ólíkt bakland og höndla lífið á mjög ólíkan hátt. Myndin einkennist af skemmtilegri sveitastemmingu, er sneisafull af húmor með ögn af rómantík

Með Ólöfu í för verður Bjarni Guðmundsson, en hann er einn af framleiðendum hjá MyrkvaMyndum.
Þau munu án efa standa sig með prýði og við hlökkum til að fá fregnir eftir hátíðina.